la cuenca on tour 2008

Tornamos a Casa

2009-03-01T23:45:00.000+01:00

Llegó'l final del viaxe y l'autobús ya taba esperándonos a les puertes del hotel. Tábamos rotos de suañu y cansanciu, con ganes de llegar a casa pa tener unes vacaciones, d'eses que te ayuden a descansar de les propies vacaciones. Llegamos al aeropuertu d'Istanbul y facturamos les maletes, con munchu miéu por que ya habíamos tenío dalguna mála experiencia. El viaxe Istanbul Madrid ye cortu y tranquilu. Desayunamos y llegamos a Madrid cola alborada. El problema en Barajas ye qu'esbillamos un vuelu d'enllaz que salía casi a la hora xintar, por que'l otru que había taba muy xustu y teníamos miéu perdelu, asina que tuvimos que pasar tola mañana pol aeropuertu madrilanu, faciendo tiempu enantes de tornar p'Asturies. Entretuvímonos caleyando poles diferentes terminales, tomando daqué, lleendo la prensa y descansando un poco les sueles de los pies, que ya nos pidíen clemencia.

Dempués de la cola de turnu pa facturar, que a esa altura del viaxe ya facíamos ensin pensar, por que yeramos unos profesionales de la facturación, montamos por fín nel avion que nos diba a llevar a Ranón, xunto con delles personalidaes del gobiernu asturianu, que veníen de Marruecos (d'un viaxe diplomáticu de xuru...). Entamamos a ver monte y un cielu encapotáu que nos anunciaba que habíamos llegao a casa. Nel aeropuertu, les nueses families taben ya esperándonos pa tornar a la cuenca en coche.

Asina foi la nuesa aventura en tierres turques, un viaxe percompletu onde lo pasamos bien, visitamos munchos sitios y conocimos delles coses. Un viaxe pa recordar y pa recomendar. Los viaxes suelen ser d'ida y vuelta, con un entamu y un final, igual qu'esti blogue, qu'entamó decidiendo el destín d'un viaxe que posiblemente nun se repita enxamás, nes mesmes condiciones que se fizo y termina echando la vista atrás y pensando no que vivmos y la buelga que va dexar en nós pal restu la nuesa vida. Asina fino'l viaxe a mesmu tiempu que fina esti blogue. Esperemos que se torne a repetir dalgun día...

Les Últimes Hores

2009-02-10T16:59:00.000+01:00

Yera algo temprano pa cenar, asina qu'entamamos a caleyar cai abaxo cola sensación na tiesta de que'l viaxe ya finaba y había que aprovechar les últimes hores. Dímonos cuenta que entá teníamos delles llires turques en bolsu y sabíamos que si intentábamos cambiales nel aeropuertu díbamos a salir perdiendo. Esti ye un tema complicáu, por que enantes de colar pa la Capadocia, tuvimos que cambiar euros a llires, a sabiendes que nel restu del viaxe nun díbamos a atopar cases de cambiu (Döviz) con tanta facilidá, pero nun podíamos cambiar muncho pa que nun nos sobrara al final y perder perres nel cambiu a euros, otra vegada. Como había que cambiar eses perres, aprovechamos pa mercar caxigalines de turista, regalinos pa la familia y una caxa d'aquellos pastelinos que había den delles confiteríes y que ya nos habíen llamao l'atención cada vegada que pasábamos pol escaparate. Repartímolos salomónicamente y duraron dos minutinos, aunque la sensación de fartura que nos dexó, duró daqué más.

Tiramos en dirección a Santa Sofía, por que como yera Ramadán, aquel parte que taba ente Santa Sofía y La Mezquita Azul, yera una fiesta, con puestos de comida, tiendes y xente asgaya, como si tuviéramos en San Pedru de La Felguera. Teniendo en cuenta que, la nuesa motilidá gastrointestinal nun había camudao del estáu sólidu en tol viaxe, quisimos tentar a la suerte comiendo un quebab turcu nun chigre de dudosa llimpieza. Habíamos lleío na rede que'l quebab turcu yera mui estremáu al que se podía xintar por España, por que tenía un sabor a montunu pergrande y había xente que-y resultaba desagradable. Fuimos a comprobalo a un bar y mandáronnos xubir a la parte d'arriba. Llera un sitiu afayaizu, por que tábamos nun comedor, casi solos, viendo tol parque y la xente que diba d'un lláu a otru. Xintamos el quebab y la verdá ye que nun nos paeció pa tanto. Si tas avezáu a xintar corderu a l'astaca de Peña Mea, de xuru que tienes otru conceptu de lo que ye sabor a montunu. Terminamos de cenar y baxamos de nuéu al megoyu dando l'ultimu paséu ente la xente que aprovechaba les hores nocturnes pa xintar, beber y facer tolo que'l Ramadán prohibe pol día. Ya yera algo tarde y pensando nel viaxe de vuelta y que en poques hores, el bus diba a dir a buscanos al hotel, decidimos dir tornando pa la habitación, a ver si polo menos nos daba tiempu a dormir un par d'hores y poder duchanos. El viaxe finaba nel mesmu sitiu qu'había entamao, na tremenda ciudá d'Istanbul.

La cabera decisión

2009-02-09T12:12:00.000+01:00

Tuvimos suerte por que nun tardaron muncho en repartinos polos diferentes hoteles onde ya habíamos dormío los tres primeros díes que tuvimos n'Istanbul. Yera ya de nuechi y tábamos ensin cenar, pero nun teníamos fame, lo que más nos pruyía yera'l cansanciu y el sueñu, por que la mayoría de lo que habíamos dormío había sío encoyíos nel asientu del bus. L'avión con destín Madrid salía de madrugada y como teníamos que tar una hora enantes del vuelu nel aeropuertu, teníamos que salir del hotel a les 3 y pico la mañana. Llegaos a esi momento, tuvimos que tomar una decisión, o díbamos pa la cama a descansar les poques hores que quedaben entantes de que viniera el bus a buscanos o aprovechábamos les poques hores que nos quedaben n'Istanbul, a sabiendes que igual nun volvíamos na nuesa vida. Dempués de facer conceyu ente nós, garramos les mochiles tiramos pa la cai, a pasar la cabera nueche n'Istanbul.

La Cabera Xornada

2009-01-19T18:37:00.000+01:00

Llegó el día de tornar a Istanbul, el viaxe más llargu que díbamos facer n'autocar en un solu día. Salimos del hotel bien ceo, enantes d'alborecer y montamos nel bus, buscando los asientos d'alantre pa evitar mareos indeseaos. La verdá ye que a eses altures del viaxe teníamos munchu cansanciu acumuláu y sobre too, muncha falta d'hores de suañu. Asina que al final la xornada nun se nos fizo tan llarga por que dormimos gran parte del viaxe.

Dende facía unos díes falábamos con xente que facía el viaxe nel mesmu autobus que nós y cuando ya entamaben a tener un poco confianza siempres salía'l tema de la cagalera. Segun pudimos saber, la mayoría del pasaxe ta escagalurciáu, tomando medicación p'algamar cortala y teniendo que dir al water ca poco. Neso tuvimos muncha suerte, por que mercamos agua na cai en tiendes del pueblu y puestos ambulantes, comimos en sitios de dudosa llimpieza y nun nos pasó na. Debíamos ser los únicos que nun tábamos escagaleraos.

La primer parada nel viaxe pa mexar y estirar les piernes, foi nel llagu Tuz o llagu saláu, que ye'l segundu mayor llagu de Turquía. Durante'l branu la mayor parte del agua evapórase y dexa'l descubiertu una capa de sal de 30 cm d'espesor de media. Nel inviernu parte de la sal tórnase a disolver nel agua qu'entra.

En Turquía como en munchos sitios turísticos tienen la fea costume de facete pagar si quies mexar en sitios como l'area de descansu que taba onde'l llagu. Pero un paisanu de La Felguera nun paga nin una llira turca habiendo matos y campu abiertu... Dempues de facer tolo que teníamos que facer y dar un paseín ente'l suelu saláu del llagu, tornamos al bus. Teníamos una facilidá tremenda pa tornar a garrar el suañu, asina que al poco ya tábamos relaxando los güeyos. Despertamos casi al llegar a la capital Ankara onde dimos una vuelta pol cascu urbanu en busca del Muséu de les Civilizaciones d'Anatolia onde pudimos ver munchos de los oxetos que se sacaron de les excavaciones que ya habíamos visto durante'l viaxe y de les diferentes cultures que poblaron aquella tierra. Entá quedaba un buen cachu hasta llegar a Istanbul. Esi trayeutu ficímoslu namás parando pa xintar nun típicu chigre de carretera con tienda de souvenirs debaxo que nun se sabía si yera turcu o de les afueres d'Albacete. Medio fartuquinos, echamos la cabera siesta nel autocar hasta que llegamos ya de nueche a Istanbul, onde nos fueron dexando nos mesmos hoteles que tuvimos nos primeros díes del viaxe.

Chimenees de les Fades

2008-12-24T00:42:00.000+01:00

El sextu día entamaba, con munches coses pa ver y nun podíamos perder nin un minutu en subir a l'autocar y entamar la xornada.

Tocaba conocer la Capadocia. Nel valle de Göreme visitamos les distintes ilesies colos sos frescos rupestres d'orixe cristianu, excavaes na roca, asina como les cases de los vieyos habitantes del llugar.
Lluéu tiramos pal pueblu troglodita de Uçhisar col so "Kale" o castiellu que taba al lláu dun pueblín perguapu, onde l'agricultura, la ganadería y en pequeña midía el turismu, yeren los sustentaores de la xente que vivía ellí. Hubiera merecío la pena dar una paseín tranquilu por aquel pueblu pa ver la vida de la xente del llugar. Conocimos tamién los valles d'Avcilary Güvercinlik y tuvimos la ocasión de ver les mítiques chimenes de les fades con una visita relampagu, en plan, baxar de bus, y tener media horina pa ver lo que querais, pero volver pronto.

Dempués d'eso tuvimos que pagar l'impuestu revolucioanriu de la guía y tuvimos qu'aguantar el peñazu de la propaganda d'una tienda de xoyes. Una visita a la tienda, coles detallaes explicaciones de los vendeores y la so posterior espera y esperanza de que mercáramos daqué. Na más que pudimos, colamos pa la cai.

Yera la hora de comer y lleváronnos a un chigre que yera una recreación, en plan modernu, d'una posada medieval, pero nun yera autentica. Movíamonos pola Capadocia n'autobus y vimos a delles persones que diben faciendo rutes en bici. Esto tenía que tar guapo, pero nun teníamos el tiempu que fai falta pa organizar un viaxe asina. Visitamos la ciudá subterránea de Özkonak, o polo menos una pequeña parte d'ella. Nesta ciudá escondíense los cristianos p'abellugase de los ataques árabes.

Dempués d'esto tocó la otra parte del impuestu revolucionariu, un show al más puru estilu tele-tienda nuna fábrica d'alfombres turques, con visita al taller onde había delles mocines texiendo. Foi más entretenío que lo de les xoyes, pero toconos los coyones pola imposición comercial y que lluéu nos sitios rialmente interesantes, nos tuviere racaneando'l tiempu.

Más tarde, tornamos al hotel a pasar la cabera nueche na Capadocia. Al día siguiente, esperábanos un llargu viaxe hasta tornar a Istanbul con munches hores d'autobus.

De Pamukkale a la Capadocia

2008-12-13T20:14:00.001+01:00

El quintu día del viaxe, salimos del hotel enantes de l'alborada. El bus llevonos cerquina, a los famosos castiellos d'algodón de Pamukkale. Llegamos a l'antrada del muséu al aire llibre que ya yera vezu nesos díes y entramos. De mano, entramos na Hierápolis, vieya ciudá helenística que foi destruía por un terremotu en 1354.

Caleyamos, sobre too, pola necrópolis, ente los restos de tumbes, mientres les primeres lluces del día entamaben a allumanos. Un sitiu perguapu, pa tar tranquilamente dando un paseín, pero la prisa de la guía que nos llevaba, nun nos dexaba munchu relax.

Atravesando la Necrópolis llegamos a les formaciones de piedra caliza y travertino de Pamukkale, patrimoniu de la humanidá de la Unescu, onde nos dimos cuenta que l'expectáculu que debería ser taba demasiao manipuláu de cara'l turismu y l'agua ya nun baxaba pola montaña, sinon, que taba canalizao y había dalgun estanque fechu de formigón. Sicasí, ye una cosa que merez la pena ver.

Volvimos al bus y tiramos en dirección a Konya pa ver el mausoléu del poeta sufí, pá de los derviches danzantes Celaleddin Mehmet Rumi. Yera una especie de muséu, onde taben les tumbes del poeta, el so fíu y los sos discípulos, onde se podía ver a xente rezando delantre de les reliquies. Tornamos al bus a facer la pila kilómetros que nos esperaben pa esi día.

Paramos a xintar nuna Kervansaray, una posada d'antiguos viaxeros de la ruta de la seda, onde facíen noche dexando a bon recaudu les sos mercancíes. Esta posada taba rehabilitada en forma de restaurante.

Al finar, otra vegada autocar y tola tarde de carretera hasta llegar a facer nueche na Capadocia onde llegamos al hotel y dempués del bañu na piscina de rigor (taba frío de coyones, pero somos paisanos de la cuenca...), fuimos a cenar, casi tan bien como'l día anterior.

Buscando a Afrodita

2008-12-10T00:59:00.000+01:00

La cuarta xornada entamaba bien ceo. Yera'l primer día de viaxe adientru'l país y entamamos nel aeropuertu d'Istanbul, enantes de l'alborada. Dempués d'esperar el tiempu protocolariu d'embarque, xubimos a l'avión con dirección Esmirna/Izmir. Al llegar ya yera de día, garramos les maletes y montamos nel autocar que nos diba llevar a dellos sitios, finando en Pamukkale.

El primer destín yera La casa de la Virxen María. Taba nun altu, cerca una biesca y d'una fonte. Cuenten que foi el caberu llugar onde vivió la Virxen xunto con Xuan. La xente que la descubrió, llegó hasta ellí buscando agua y toparon la cabaña. Agora ye una especie d'ermita, onde se fai peregrinación. Nel llugar hai una costume pagana, que ye atar un pañuelu a un árbol hasta que se te conceda'l deséu que pides. Al pie de la casa, los turistes adapataron esi vezu, atando pañuelos de papel nuna muria.

El siguiente destín yera Éfeso pueblu del estudiáu Heráclito (en filosofía del institutu), onde pudimos ver unes ruines muy prestoses que dieron un vuelcu radical a la temática del viaxe. Llamónos l'atención el teatru, el templu d'adrianu y sobre too, la biblioteca de Celso.

Llegó la hora xintar y lleváron-nos a un chigre de carretera onde nos dieron una comida que nun yera pa tirar volaores, pero mataba la fame. Tábamos cerca d'Afrodisias que yera'l nuesu proximu destín. Al llegar, vimos que yera otru muséu al aire llibre, al estilu de'l de Éfeso. La verdá ye que pagó la pena velo. El tetrapilón yera impresionante, l'odeón, l'ágora, pero lo que más nos prestó foi l'estadiu.

Al finar la visita, tornamos pal bus y tiramos camín de Pamukkale.

Al llegar dixéron-nos que nel hotel había agües termales y baños de barru, asina que faltonos tiempu pa dexar la maleta n'habitación pasar fugazmente pol comedor pa cenar y tirar pa la piscina. Foi una pena, por que la comida yera la meyor de tol viaxe. Coses estremaes de verdá, con tastu oriental y bien preparaes, como pa pasase tola nueche xintando como gochinos. Pero lo de les termes llamónos tanto l'atención que les ganes de moyanos ganaron a la gula. Nun sé la hora que nos dió dientro'l l'agua, pero llegamos los primeros y marchamos los últimos, colos deos arrugaos y la sensación d'haber dexao nel agua, tol cansanciu acumuláu n'Istanbul. !!Que bien nos vino!!. Yera una piscina con agua termal, cubierta que fervía, otra itermedia al aire llibre y la típica que tolos hoteles tienen ente les meses de la terraza-chigre. Nun nos quedó nenguna ensin probar, hasta lo del barru que taba nuna terraza d'un pisu superior. Quedamos nuevos.

Supermercáu Dia

2008-11-20T00:12:00.000+01:00

El tercer día, madrugamos pa poder cambiar perres nuna casa de cambiu que taba cerca de la Mezquita Azul, na cai del tranvía que tantes vegaes caleyáramos. La mala suerte fizo que tuviere zarráo y tuvimos qu'esperar 20 minutinos nun parque qu'había enfrente, viendo pasar a la xente que diba camín del trabayu. Esi día decidimos dir al palaciu de Topkapi, asina que tiramos p'allá lo más pronto que pudimos pa nun topar muncha xente, aunque l'asuntu del cambiu perres ya nos había fastidiao un tiempu perguapu.

Vimos el palaciu d'arriba a abaxo, coles sos armes, les reliquies de Mahoma, los tesoros, les turqueses, les cocines, les armes, los edificios y les decoraciones de paredes y techos y el famosu harén. En mediu la visita pudimos ver una banda música del exercitu turcu con muncha percusión y vientu, tocando temes, prestosos y exóticos.

La visita foi llarga, asina que al salir tiramos pal bazar de les especies pa mercar una bolsina de té de canela, que nos habíen dicho que taba rico en forma. Mirando tiendes llegonos la hora xintar, asina que fuimos pa la zona onde teníamos l'hotel, por qu'habíamos visto qu'había munchos chigres. Xintamos el famosu corderu turcu nuna terraza y tomamos otru té de manzana de los que tanto nos prestaron.

Dempués de xintar fuimos pa la zona de Galata, cruzamos el puente y buscamos la Cai istiklal caddesi. Habíamos sentío que yera una cai con muncha vida, que nun tenía na que ver col Istanbul qu'habíamos visto hasta esi momentu y la verdá ye que nun nos defraudó. Atopamos un bon ambiente, con chigres al estilu européu, música na cai, munches tiendes d'instrumentos musicales y un tranvía con aspectu vieyu, perguapu, non como'l que vimos na zona de Santa Sofía, que mas bien paecía un metru.

El día terminaba y tiramos en direicción pal Hotel, cuando de repente vimos un supermercáu marca Dia. Quedamos ablucaos y nun perdimos la oportunidá d'entrar y mercar daqué pa xintar y unes garimbes, por que teníamos claro que nesi sitiu nun dibamos atopar precios pa turistes nin muncho menos. Fuimos al hotel y regamos cola cerveza la planificación del día siguiente.

Finó'l Primer Día

2008-11-12T23:16:00.000+01:00

El día taba finando y tiramos hacia'l puertu, onta taba la ponte de Galata. Al llegar abordonos un rapaz ufiertándonos un viaxe pola costa europea del Bósforu pa tornar pola costa asiática, ensin paraes. Yera una de les coses que teníamos pensao facer, asina que decidimos facelo nesi momentu pa dir tachando coses de la llista y nun pensalo más. Dempués de facenos los remolones, pa ver si nos baxaba daqué el preciu y de qu'él nos ufiertara una barca privá de dudosa llegalidá, diximos que sí y subimos al barcu.

El castrón esperó a enllenar el pasaxe, y tuvimos casi media hora esperando y aguantando los vaivenes del barcu, que al tar paráu, yeren considerables. Por culpa d'eso, dalgunu de nós tuvo que baxar hasta qu'entamara el viaxe.

Zarpamos y vimos el trilláu Cuernu d'Oru y Bósforu dende dientro, dímonos cuenta de la magnitú de la ciudá d'Istanbul y ficimos un primer acercamientu a lo que diba ser la primer vegada que tuviéramos en tierres asiátiques. El viaxe duró una hora y la verdá ye que mereció la pena, si vas facer una visita curtia a Istanbul.

Tornamos al puertu y ya había tapecío. Fuimos hasta'l hotel y subimos a la terraza, por qu'habíamos visto que la piscina taba na azotea y tenía que tener unes vistes interesantes. Al llegar ya taba la nueche entrada asina que disfrutamos de les vistes de la ciudá con toles lluces prendíes. Nun podíamos poner pieslle a primer xornada n'Istanbul, asina que fuimos pa la zona de Sultanhamet, por que pola tarde vimos que taben montando un escenariu, asina que tenía qu'haber folixa de xuru. De camín paramos nun supermercáu pa mercar daqué pa cenar. Una vegada dientro, llamónos l'atención el yogur turcu, que tien gran fama, asina que pillamos unos yogures y unes galletines y fuimos a comeles al pie de la Mezquita Azul, onde había un conciertu-expectáculu y muncha xente. D'ehí pal hotel a planificar el día siguiente y pala cama con una gana dormir que nun nos aguantábamos ente suañu, cansanciu y dolor de pies.

Con Fabes y Sidrina...

2008-11-06T23:12:00.000+01:00

Dempues de pasar pola mezquita de Rusten Passa, entamamos a buscar la Universidá, y dímonos cuenta que la Universidá d'Istanbul ye como la d'Uviéu, que tien un edificiu hestóricu iconu universitariu, pero delles facultaes y escueles universitaries esparcíes por una fastera determinada de la ciudá. Dímonos cuenta que tabamos entrando nesa zona, pol ambiente que se respiraba, de mocedá, apuntes y facultaes varies, un poco al estilu de FP d'aquí. Siguiendo el GPS Oscarín, llegamos a la fachada de la Universidá que sal nes semeyes y sentámonos una migaya a descansar delantre d'ella.

Teníamos ganes de conoces en Gran Bazar po tolo qu'habíamos lleío d'él. Costonos un poco atopalu por que la entrada taba escondía nun callexón, pero la cantidá de tiendes qu'había al so alrodiu dicíanos que nun podíamos tar lloñe.

Entramos y perdímonos poles sos cais. Dímonos cuenta que les tiendes taben ordenaes por zones temátiques, pero pa poder velo too, casi facía falta un día enteru. La verdá ye que daben ganes de volver p'Asturies enllenos de regalinos, caxigalines y pichaes.

Como nun teníamos munchu tiempu, salimos a la cai pa dir a buscar l'otru bazar, el de les especies. Nun tardamos en llegar y entramos con tolos sentíos sollertes ante al cantidá de colores y golores que se avecinaben. Aunque munchu más pequeñu que l'otru, esti bazar tamién tien daqué especial.

Nel Bazar de les Especies foi onde vimos un puestu onde poní nun cartelu "se habla español", cerca d'esti había otru cartelu mariellu con frases simpátiques, pero quedamos ablucaos cuando ente elles pudimos lleer, "con fabes y sidrina nun fai falta gasolina". Conexión Asturies-Istanbul, pa flipar...

La Tienda de Güeyos

2008-10-28T12:29:00.000+01:00

Al salir de Santa Sofía, caleyamos en direicción al puertu y entramos en Yeni Camii, la Mezquita Nueva, que ye la que sal en tolos documentales con palombes asgaya na plaza que tien delantre. Nesa mesma plaza ta una entrada al Bazar de les Especies, pero d'aqueya nun lo sabíamos y pasamos de llargo. La Mezquita nueva y toles que visitamos esi día, prestáronnos bastante, por que yeren menos turístiques y podíes ver la xente del pueblu dir a rezar y llabase pa entrar de forma más natural, ensin sentite guiri. Tiramos lluéu pa Rusten Passa, onde nun pudimos entrar por que taben nuna oración y dixéronnos qu'esperaramos a que terminare, asina qu'aprovechamos pa descansar un poco, por que'l cansanciu ya entamaba a pesar.

Siguimos faciendo un curtiu recorríu pola cantidá de mezquites qu'hai n'Istanbul y fiumos pa Beyacit Camii. La verdá ye que nos prestó poder ver delles pa ver les diferencies y nun quedanos cola típica turística. En toes facíamos el mesmu ritual, descalzanos, meter los playeros nuna bolsa y entrar hasta'l cierre de maera que separaba a los voyeurs de los orantes.

Teníamos na mente atopar el Gran Bazaar asina que caleyamos buscando la Universidá, que sabíamos que taba cerca y tenía que ser grande como pa vese bien. Buscando ente cais, atopamos una cosa qu'enxamás habíamos visto nengunu y que nos dexó ablucaos. Una tienda que namás vendía güeyos de plástico.

Giris Entrance

2008-10-19T11:07:00.001+02:00

Al día siguiente pola mañana, madrugamos pa aprovechar el primer día completu na ciudá. Desayunamos nel buffet, más bien probe, del hotel y salimos a la cai col GPS Oscarín encendíu. Caleyando pola cai del tranvía llegamos a Santa Sofía pa poder entrar bien tempranín y que nun hubiera muncha xente. Pero llegamos tres cuartos d'hora enantes de qu'abrieren y nun queríamos perder nin un segundu, asina que aprovechamos que La Cisterna de Basílica o de Yerebatan Sarnıcı taba enfrente y que abría primero pa camudar los planes del día.

Entramos na cisterna pagando les 10 lires turques de rigor y la verdá foi que nos gustó bastante. Al ser tan temprano, tábamos casi solos y la illuminación, l'agua, la música y la sucesión d'arcos y columnes facía que l'ambiente fuera casi máxicu. A lo llargo'l viaxe visitamos sitios de los qu'habíamos lleío les crítiques d'otros viaxeros pela rede y dímonos cuenta que la xente flipa muncho y aumenta les coses abondo, pero La Cisterna, ye verdá, que nos prestó bastante.

Cuando salimos tiramos pa Santa Sofía, La iglesia de la Divina Sabiduría o Hagia Sophia, qu'entá nun había abierto, pero ya tenía delles coles con un bon puñáu de xente esperando. Al entrar comprobamos que la idea de dir temprano pa tar solos, había quedao pa práu. Santa Sofía ye bastante guapo, con frescos y mosaicos interesantes, delles plantes pa poder visitar y una zona con andamiu que xunto colos guiris y la poca lluz, estropiaben toles semeyes.

Llamónos l'atención qu'había un cartelu indicando per onde teníen qu'entrar los guiris, pa separalos de la xente turca, que lluéu veríamos por otres partes del país y que nun habíamos visto en nengún sitiu, por muy turísticu que seya. El cartelu, ye'l que veis na semeya.

Apple Tea

2008-10-09T18:26:00.000+02:00

Cuando entamaron a dexanos nos hoteles, a tola xente que dibamos nel bus, toos pensábamos, cuál sería l'orden que diben siguir, por que a los últimos casi-yos estropiaben la tarde, esperando por tolos demás. Nós tuvimos suerte y fuimos los segundos. Dexamos les maletes nel hotel, garramos les mochiles y los mapas y salimos a la cai echando osties.

Teníamos gana d'entamar a ver coses, pero teníamos un problema básicu, nun teníamos lires turques, namás euros. Habíamos lleío nos foros que cada poco, atopabes una casa de cambiu llamada Döviz, pero entamamos a caleyar y nun vimos nenguna. Cerca del hotel había una estación de tres, que lluéu lleimos que yera la última parada del Orient Express, onde se había baxao Agatha Christie cuando llegó a la ciudá d'Istanbul pa escribir "Asesinato en el Orient Express". Entramos a echar un güeyu y la verdá ye que yera un sitiu, enigmáticu, a caballu ente oriente y occidente, como tola ciudá onde hubiera prestáo pasar el tiempu que nun teníamos viendo el dir y venir de la xente.

Al pocu tiempu, entamamos a tener fame y sede. Menos mal que me alcordé d'unes ablanes que me dió el mi vecín y llevaba nel macutu. Tuvimos qu'entrugar a tres mozos que vimos que falaben español y dixéron-nos onde habíen cambiao ellos.

Oscarín, que ye un GPS andante, llevonos al parque que ta, ente Santa Sofía y La Mezquita Azul. Hubiéramos entrao nelles, pero al nun tener perres entá, decidimos entrar en La Mezquita Azul que yera de baldre, enantes de siguir buscando la casa de cambiu. Foi la primer mezquita que visitamos y el primer acercamientu al ritual d'entrada y d'oración de los musulmanes. Salimos y tiramos pola cai del tranvía p'arriba, hasta que topamos el cartel de Döviz dichosu y pudimos cambiar les perres. Lo primer foi mercar agua nun puestu cerca de Santa Sofía y probar por primer vegada'l sabor del agua Turca, que nun quita la sede. Dende esi día hasta volver a Asturies, nun se nos quitó la sensación de suela d'alpargata de la llingua.

Había qu'aprovechar esa tarde tolo que pudiéramos (igual que tol viaxe) y nun paramos un momentu. Tiramos en direicción al puente de Galata y cruzamos al otru lláu del Cuernu d'Oru. Subimos hasta la Torre de Galata y llegamos a la so base ya de nueche.

Decidimos tornar los pasos andaos y el GPS d'Oscarín entamó a funcionar otra vegada. Cenamos corderu con arroz y pimientos nun bar cerca del hotel. Dempués de cenar, el chigreru invitonos a un té de manzana, que foi el primeru que tomamos y ye'l que se ve na semeya.

cabeza X 4

2008-10-01T22:41:00.000+02:00

Cuando llegamos al tour operador que nos correspondía en Barajas (dempués de buscar un cachu pola T1) dionos los billetes con una nota que ponía "cabeza x 4". L'extrañu nome del nuesu grupu correspondía al apellidu d'Oscarín y al númberu d'individuos. Esos billetes valiéron-nos pa aterrizar nel aeropuertu d'Istanbul. Enantes de dir a garrar les maletes, había que pasar por una ventanuca pa pagar 10 € y que te pusiéran una pegandiella nel pasaporte. El problema yera saber cuál yera la ventanuca correuta, por que la xente llegaba y facía la cola en cualequier mostrador, asina que tuvimos un cachu faciendo cola pa na, hasta que nos enteramos como diba l'asuntu. Ya cola pegandiella, pasamos por una especie de policía bastante mozu que te miraba con galbana y te ponía un sellu enriba la pegandiella. Ya teníes permisu pa tar en Turquía y el siguiente pasu yera garrar la to maleta.

Na cinta d'equipaxe, les maletes fueron llegando, hasta que salió la de Riera, con una rueda colgando y más grietes que la cara d'una vieya. Debieron xugar un partíu fúbol con ella, por que nun podía tar más rota. Salimos a buscar al enllaz del tour operador que nos diba llevar hasta'l hotel. Atopamos a la moza y contámos-y lo de la maleta, asina que mandonos entrar otra vegada a poner una reclamación mientres ella esperaba a los demás viaxeros. Darviz y Riera entraron, mientres que Oscarín y yo quedamos na entrada del aeropuertu pa controlar que la moza nun colara y nos dexara ellí solos. Polo visto, nel mostrador de les reclamaciones había una moza que nun se enteraba muncho de la vaina, y falaba un inglés de turquía, complicáu d'entender. Dexolo too claro cuando ellos, llegaron cola maleta nuna mano y la rueda notra y la moza entrugó ¿missing o damaged?...

Mientes tantu, la tour operadora díxonos a Oscarín y a mí que nos esperaba nel autocar y que cuando acabaran, podíamos salir fuera y ya nos vería. A mí sonome a que nos dexaba en tierra, asina que mientres yo esperaba por Riera y Darviz, Oscarín fizo d'espía pa ver si la rapaza colaba o nos esperaba. Dempués d'una espera tensa, llegaron Darviz y Riera con una fueya escrita en Turcu y la sensación de nun haber fecho na. Salimos a buscar l'autobus y Oscarín llevonos hasta onde taba aparcáu. Ya n'Istanbul entamamos el viaxe hasta'l hotel.

la salida

2008-09-26T20:08:00.000+02:00

Ficimos la salida dende Mieres pa nun tener que dir hasta Uviéu. L'Alsa llegó con retrasu y el conductor yera'l típicu paisanu gordu, piquiñucu y faltosu, qu'entamó a metenos prisa y pagar con nós el fechu de tener que trabayar de nueche. A l'altura Barrios de Luna, casi echo l'hígadu y poníame peor pensando los 1400 km que nos quedaben por facer por tierres otomanes (unque dalgun pensara que taba xintando un bocata chorizu...). Maldormimos nos asientos del autobus, hasta llegar a Madrid.

L'Alsa paró nuna estación que taba lloñe de la T1, que yera d'onde nos salía l'avión. El conductor faltosu dexónos ellí cola excusa de que diba venir otru bus pa llevanos al aeropuertu y coló. Atopámonos coles maletes na mano, nuna estación que nun sabíamos onde taba, a les 7 la mañana y cola incertidumbre de si llegaría otru bus pa llevanos o non. Dempues d'esperar un bon cachu y ponenos nerviosos, otru conductor entrugónos pa onde díbanos y díxonos que montáramos nel so autocar. Al final llegamos con tiempu suficiente como pa facer una cola de la virxen y facturar les maletes. Con bastante cansanciu y una nueche ensin dormir, entamamos el vuelu al aeropuertu d'Istanbul. Menos mal que durante'l viaxe nos dieron una bandexina con pan, xamón y quesu, d'eses que dan nos aviones, por que teníamos una fame como pa xintar un turcu enteru.

A les 4 hores y media, llegábamos a Istambul.

ya llegamos!!

2008-09-22T20:18:00.000+02:00

Güei a les cuatro la tarde llegamos al aeropuertu de Ranón. Muuunchu cansanciu y suañu por que además de los kilómetros acumulaos, llevamos despiertos dende les 5 la mañana d'ayeri. Llegamos sanos y salvos y nun nos pasó nenguna desgracia, polo menos que nun se pueda solucionar. Nun pudimos conectanos dende Turquía aunque tolos hoteles teníen wifi y nos hubiera prestao, pero vamos contavos tolo que pasó agora, a toru pasáu. Traemos la maleta enllena de cansanciu físicu y mental, experiencies, kilómetros, rises, suañu, visites, pateaes, comida montuna, regateos, menhires, carreres, sudaes, sede, recorríos alternativos, aviones, autobuses, copito, maria luisa, óle, contar rayes, lires, döviz, derviches, orsep royal, barru, agua caliente, muy caliente, agua fría, pañuelos na tiesta, te kah, bazares, i don't like spanish people, tetrapilones, sherpas, boques abiertes, a lot of, big water my friend, l'alpargata na llingua, pastelinos de pistachu, panoyes y castañes indies, palacios, mezquites, pasaportes, aeropuertos, maletes, mochiles, gallines clueques, falos, tortugues, dieguín, camii, ramadan, cadesi, jose luis, ¿y en pesetes cuanto ye?, minaretes, pamukkale, ness, el egipciu, estómagos de fierro, interpretaciones, attaturk y tolo que se me escaez agora pero que dirá saliento nos díes que vienen.

Vamos intentar cuntavos unu de los meyores viaxes de la nuesa vida.

Paez mentira que güei mesmo tuviéramos ellí.

que poco nos queda

2008-09-14T22:28:00.001+02:00

Ya nun queda nada!! De xuru que dexamos algo importante ensin meter na maleta, pero bono...

Tuvimos de tarde con Isa y Veli que nos vinieron ver y ya se notaba l'ambiente pre-recollo. Tenemos tola nueche pa planificar los díes d'Istanbul y poder aprovechar el tiempu al 100% cola super guía que mercó Oscarín. Agora tenemos qu'espabilar al conduztor del Alsa pa que nos lleve a la hora que tenemos que tar en Barajas y nun se entretenga na estación del Alsa de Madrid. A ver si nos lleva hasta la T1. Bono guajes, si se pue, postiaremos dende Turquía, si non, el llunes 22 tornamos si ye qu'entá tamos vivos. Un saludu a toos y toes y arrevoire que dixo Voltaire...

los cuatro xinetes

2008-09-14T00:38:00.001+02:00

Ya nun queda nada. Mañana de nueche garramos l'Alsa en Mieres pa tirar pa tierres madrilanes. Al final nun miramos tanto pola rede y acabamos mercando una guía que paez que tien bona pinta y vamos estudiala nel viaxe a Madrid, a parte de dalguna fueya que sacamos pola impresora coles explicaciones d'otros viaxeros. Nun sé si esti será l'ultimu post enantes de colar (igual cai otru si tengo tiempu), pero lo que nos prestaría, sería poder postear dende Istanbul, aunque nun vamos llevar ordenador, asina que nun sé si se nos va arreglar. Sicasí, de xuru qu'en viniendo, cai alguna semeya y les desplicaciones de les aventures nel viaxe.

Agora toca facer la maleta.

A la Gueta

2008-09-11T23:38:00.000+02:00

Ya tamos inmersos na planificación de los díes d'Istambul. Na rede hai más información de la que podamos procesar o retener, pero hai que dixebrar el granu de lo demás, por qu'hai sitios onde la información ta más concentrada qu'otros. Los foros son un bon sitiu pa enterate de coses, lluéu tan les páxines web profesionales, institucionales o personales, pero l'aparición de los blogues trainos información non comercial de primer mano. Preba d'esto ye un blog qu'atopó Darviz y que me paez que ye de llectura indispensable si quies dir a esa ciudá. Sí, hai xente tan friki que te cuenta con detalle lo que foi el so viaxe y podemos facer la broma típica del blogueru de: "sí, fice caca", pero el blog del que tamos falando ye un regalu pa cualesquier persona que quiera facer un viaxe y ande a la gueta d'información.

Equí teneis l'enllaz.

ta too pagao

2008-09-10T20:46:00.000+02:00

Acabamos de dir a l'axencia a pagar el viaxe. Agora sí que nun hai vuelta atrás y si ye que la pue haber, de xuru que ye dolorosa. Agora, polo visto, ya nun dan billetes. Dante un folio sacáu de la impresora que tienes que presentar nun mostrador pa que te den los verdaderos billetes. La mala noticia ye que'l Alsa que nos va llevar dende Mieres a Madrid, nun ye supra, por que, una de dos, o nun nos explicamos bien o la moza nun nos entendió...

Pero bono, dentro lo que cabe ye un mal menor. Agora tenemos que quedar pa planificar bien los díes d'Istambul, por que hai muncho que ver y pocu tiempu pa facelo.

Ta bien eso de salir dende Mieres. Mira que garrar un Recollo pa dir a Turquía...

la gallina feliz

2008-09-09T20:18:00.000+02:00

Dempués que Darviz tuviere dellos díes sintendo el cantar d'una pita cada vez que nos veía (co coco coooo) paez que les coses entamen a dir pol bon camín. Aunque quiero más dicilo cola boca piquiñina por si acasu, paez que ta too arreglao y va poder dir sin problemes. Osea, que nun vamos tener que pagar la talegada a lo pijo y quedar con cara tontos... de momento.

Volvimos a l'axencia y ya pillamos l'Alsa pa dir hasta Madrid y pela rede, na páxina easyjet el vuelu pa tornar dende Madrid. Paez que la cosa va tirando... a ver cuantu tiempu pasa sin que se tuerza na. Mañana quedamos pagar y garrar los billetes.

el hotel

2008-09-06T13:14:00.000+02:00

Atopé la web del hotel nel que vamos dormir en Istambul. Paez que tien bona pinta, aunque'l que faiga una web del so hotel y consiga que tenga mala pinta, ye pa matalu. Ya sabemos que les semeyes son como la tele, too mentira. Lo bono que tien ye la situación, por que ta metíu nel megollu del cascu vieyu y ta cerquina de munchos de los sitios emblemáticos. Estes son dalgunes de les distancies que pon na web:

MAJOR DISTANCES

Int. Ataturk Airport
18 KM
30 min.
Int. Sabiha Gökçen Airport
45 KM
55 min.
Central Coach Station
8 KM
20 min.
Int. Sea Port
800 M
10 min.
Int. Sirkeci Train Station
200 M
5 min.
The Nearest Tram Station
100 M
2 min.
The Nearest Public Sea Port
400 M
8 min.
The Nearest Border IPSALA
250 KM
3 Hrs.

Nearest museums
Distance
Topkapi Palace
350 M
St. Sophia Museum
250 M
Turkish & Islamic Art Museum
500 M
Archeological Museum
350 M
Tile Museum
350 M
Saint Irene
350 M
Mosaic Museum
950 M
Carpet Museum
950 M
Basilica Cistern
300 M
Grand Bazaar
950 M
Spice Bazaar
300 M
Hippodrome
500 M
Dolmabahce Palace
5 km

Si quereis echar un güeyu a la páxina del hotel, pincha equí.

esto vamos facer

2008-09-06T00:09:00.000+02:00

Vamos pensar un poco nel viaxe. Esta ye la ruta que vamos facer.

Día 1 Llunes: España/Istambul

Presentación enl aeropuertu. Salida en vuelu con destín Istambul. Llegada, asistencia y trasladu al hotel.

Días 2 y 3 Martes y Miercoles: Istambul

Estancia en reximen d'alojamientu y desayunu. Dies llibres. Posibilidá de realizar dalguna de les visites y excusiones de l'axencia.

Día 4 Xueves: Istambul/Esmirna/Éfeso/Afrodisias/Pamukkale

Desayunu. Trasladu el aeropuertu, pa salir en vuelu con destín a Esmirna. Llegada y continuación hacia Éfeso pa visitar la ciudá clasica, que fue capital d'Asia menor y unu de los conxuntos artísticos helenísticos más representativos de la so época, nel que destaquen l'Odeón, la puerta d'Hércules, el Templu d'Adriano, la Biblioteca de Celsu, l'Agora y el impresionante Teatru Romanu. Seguidamente vamos visitar la casa de la Virxen María nel monte de Panayir. Almuerzu y viaxe hasta Afrodiasis, vieya ciudá consagrada al cultu d'Afrodita, diosa del amor y la belleza. Nel recintu pue vese el teatru, l'Agora, el Templu d'Afrodita, el bañu romanu, l'Odeón, l'estadiu y el tetrapilón. Siguiremos hacia Pamukkale, famosa poles sos cascades calcárees petrificaes conocíes como castiellos d'algodón, que se formaron a causa de la cal contenía nel agua qu'emana na zona. Visita de la ciudá romana de Hierápolis, ciudá balnearia romana construida sobre les cascaes que tien una necrópolis de más de 150.000 tumbes y conserva les ruines de los baños romanos, el teatru, la basílica cristianan, etc. Cena y a dormir.

Día 5 Vienres: Pamukkale/Konya/Capadocia

Desayunu. Salida n'autocar hacia Konya, vieya capital del imperiu selyúcida. Llegada a Konya y visita del Mausoleo de Mevlana, poeta que difundió el sufismo y fundador de la orden de los Derviches Danzantes. Almuerzu. Continuación hasta la Capadocia. En ruta, visita d'un kervansaray, antigua posada medieval de la ruta de la seda. Llegada a Capadocia. Cena y alojamientu. Pola nueche, posibilidá d'asistir a un espectáculu de dances folclóriques del país o a una representación de la mística danza de los derviches.

Día 6 Sábadu: Capadocia

Desayunu. Visita d'esta fantástica rexón, mezcla de los caprichos de la naturaleza y l'arte humanu. Realizaremos una visita panorámica del fascinante valle del pueblu troglodita de uçhisar, famosu por el kale o castillo de Uçhisar, un inmensu promontoriu rocosu d'orixe volcánicu con viviendes, escaleres y túneles excavaos en la roca y de los espectaculares parajes volcánicos (Chimenees d'Hades) de los valles de Avcilar y Güvercinlik. A continuación visitaremos el valle de Göreme, muséu al aire llibre de iglesies rupestres en forma de monolitos volcánicos y decorao con frescos. Almuerzu. Visita de la ciudá subterránea de Özkonak o similar, excavada poles comunidaes cristianes pa defendese de los ataque árabes. recorríu pol valle de Pasabagi o Çavusin. Seguidamente demostración del arte milenaiu de texer a manu alfombres y kilims nun taller especializáu y visita d'un taller artesanu de decoración y xoyes. Cena y alojamientu.

Día 7 Domingu: Capadocia/Ankara/Istambul

Desayunu. Salida n'autocar hacia Ankara, pasando pol llagu Saláu, el segundu más grande del país. Llegada a la capital del Turquía, donde vamos visitar el Muséu de les civilizaciones d'Anatolia, qu'expón una rica colección d'arte hitita. Almuerzu en ruta. Continuación del viaxe ahcia Istambul pasando poles montañes de Bolu. Llegada a Istambul y alojamientu nel hotel.

Día 8 Llunes: Istambul/España

Desayunu. Trasladu al aeropuertu. Salida en vuelu de regresu a España. Llegada y fin del viaxe.

el cuartu pasajeru

2008-09-05T23:40:00.000+02:00

Darviz ya sabe la fecha de la so cita llaboral y cai dempués del viaxe. Pero la complexidá de la cita fai que se pueda adelantar o que la selmana del viaxe tea que facer dalguna xestión, asina que fuimos a l'axencia a que se diera de baxa, por que ayeri díxonos la moza de l'axencia que como yera pronto igual nun teníamos que pagar na. Pues cuando llamó pa dicir que había que dar de baxa al cuartu pasajeru (pallabres textuales...), contestaron que había que pagar 300 € y esa cantidá diba subir segun se fuera acercando la fecha del vuelu. Osea, que'l próximu día llaboral que ye'l martes 9, pue ser que tuviéramos que pagar 600 o 700 €. Asina qu'había que tomar una decisión rápida. Ante tal asuntu decidimos entamar a buscar un cuartu compañeru pa sustituir a Darviz, por que esa yera la única solución pa nun tener que pagar na pola anulación.

¿Vienes de viaxe a Istambul del 15 al 22 de setiembre?

sigue'l problema

2008-09-05T00:49:00.000+02:00

Volvimos a l'axencia a ver si arreglábamos algo por que Darviz nun tuvo nenguna noticia nel día de güei, asina que tábamos igual qu'ayeri. La moza dixo qu'aguantó lo de facer el seguru de cancelación hasta güei pa ver si ya sabíamos algo pero que ya nun podía esperar más, asina que tuvimos que facelu, 34 euros por barba. Cuando llamó pa contratar el seguru, entrugó el tema de les habitaciones triples y consiguió que nos aceptaran nuna triple en casu de que Darviz cayera de la llista. Esto foi una bona noticia por que si a Darviz nun se-y arregla, ya nun tenemos que pagar los 600 euros de l'habitación simple. Paecía que la cosa diba arreglándose. Pero entós contonos que'l seguru nun tien por qué devolver el 100% de lo que la póliza cubre y que hay que xustificar una enfermedá grave (ente otres posibles coses), lo que a mí me paez un términu algo ampliu y subxetivu. Bono, el casu ye que siguimos ensin saber si vamos perder perres ni cuantes. Güei vienres, ye fácil que Darviz sepa algo más concreto sobre'l so asuntu. Mientres tantu, buscamos información sobre Istambul, nos foros, vídios del youtube y baxando programes de la tele del Ares (aunque de cada dos programes, unu ye una peli gochona...). Pronto habrá más episodios, pa bien o pa mal.

el primer gran problema

2008-09-04T01:12:00.000+02:00

Yera dificil cuadrar pa poder dir toos xuntos. Riera y yo tuvimos que facer unes xestiones nel trabayu pa poder tar llibres del 15 al 22 de setiembre, pero nun contábamos con esto. El mesmu día de facer la reserva, Darviz diznos que depende d'una cita llaboral que pue caer na fecha del viaxe. Asina y too, reservámoslo, pensando en facer un seguru de cancelación por si acasu. Lo malo ye que con seguru y too, perderiamos 200 euros de viaxe de Darviz más otros doscientos cada ún de los tres que quedamos por que nun hai habitaciones triples y la oferta ye namás pa dobles, asina que'l desparexáu va pagar una talegá. Aunque repartamos el pastizal que tendríamos que pagar, salnos la broma por un picu. Tamos ante'l primer gran escoyu, a ver si Darviz nos da una allegría.

¡¡ya tenemos ruta!!

2008-09-03T12:40:00.000+02:00

Vamos avanzando poco a poco. Ayeri concretamos la ruta dempués de muncho pensar y decidir. La mayoría de les rutes por Turquía, van d'Istambul a Capadocia colo que faes un viaxe en autocar de 760 kilómetros pa dir y otro tanto pa tornar (hailo n'avión pero como vamos a última hora ya nun quedaben vuelos...). Al tar tan lloñe uno d'otro, pierdes dos díes de viaxe, asina que al final decidimos dir n'avión hasta Esmirna, pa conocer Pamukkale y dalgun pueblu más de la que vamos pa Capadocia n'autobús, sacrificando un día de Capadocia, pa nun quitar nengunu d'Istambul, por que muncha xente nos dixo que con una selmana n'Istambul, nun lo ves too.

primera decisión

2008-09-02T22:55:00.000+02:00

Bono, les decisiones qu'hai que tomar, hai que tomales, por que los díes nun esperen y si pasamos más tiempu pensándolo, va llegar el día que nun queden places d'avión. Los cuatro sabemos que un viaxe asina hai que preparalu con más tiempu, estudiar una migaya'l destín, pero lo nueso ye asina y les coses vienen como vienen. Como dixo Oscarín, "hai que facer un gabinete de crisis" y aunque vamos a pasu tortuga, polo menos, ya tomamos una decisión importante, el destín.

pa entamar

2008-09-02T14:31:00.000+02:00

Nel entamu hai que tomar munches decisiones. La primera ye'l destín, pero nun termina ehí, tan los circuitos, el día del vuelu, d'onde salimos, l'hotel, etc... Podemos poner una tienda coles revistes que ya nos dieron.

Vamos ver si se nos arregla y si podemos contalo equí.