Llegó el día de tornar a Istanbul, el viaxe más llargu que díbamos facer n'autocar en un solu día. Salimos del hotel bien ceo, enantes d'alborecer y montamos nel bus, buscando los asientos d'alantre pa evitar mareos indeseaos. La verdá ye que a eses altures del viaxe teníamos munchu cansanciu acumuláu y sobre too, muncha falta d'hores de suañu. Asina que al final la xornada nun se nos fizo tan llarga por que dormimos gran parte del viaxe.
Dende facía unos díes falábamos con xente que facía el viaxe nel mesmu autobus que nós y cuando ya entamaben a tener un poco confianza siempres salía'l tema de la cagalera. Segun pudimos saber, la mayoría del pasaxe ta escagalurciáu, tomando medicación p'algamar cortala y teniendo que dir al water ca poco. Neso tuvimos muncha suerte, por que mercamos agua na cai en tiendes del pueblu y puestos ambulantes, comimos en sitios de dudosa llimpieza y nun nos pasó na. Debíamos ser los únicos que nun tábamos escagaleraos.
La primer parada nel viaxe pa mexar y estirar les piernes, foi nel
llagu Tuz o llagu saláu, que ye'l segundu mayor llagu de Turquía. Durante'l branu la mayor parte del agua evapórase y dexa'l descubiertu una capa de sal de 30 cm d'espesor de media. Nel inviernu parte de la sal tórnase a disolver nel agua qu'entra.
En Turquía como en munchos sitios turísticos tienen la fea costume de facete pagar si quies mexar en sitios como l'area de descansu que taba onde'l llagu. Pero un paisanu de La Felguera nun paga nin una llira turca habiendo matos y campu abiertu... Dempues de facer tolo que teníamos que facer y dar un paseín ente'l suelu saláu del llagu, tornamos al bus. Teníamos una facilidá tremenda pa tornar a garrar el suañu, asina que al poco ya tábamos relaxando los güeyos. Despertamos casi al llegar a la capital Ankara onde dimos una vuelta pol cascu urbanu en busca del Muséu de les Civilizaciones d'Anatolia onde pudimos ver munchos de los oxetos que se sacaron de les excavaciones que ya habíamos visto durante'l viaxe y de les diferentes cultures que poblaron aquella tierra. Entá quedaba un buen cachu hasta llegar a Istanbul. Esi trayeutu ficímoslu namás parando pa xintar nun típicu chigre de carretera con tienda de souvenirs debaxo que nun se sabía si yera turcu o de les afueres d'Albacete. Medio fartuquinos, echamos la cabera siesta nel autocar hasta que llegamos ya de nueche a Istanbul, onde nos fueron dexando nos mesmos hoteles que tuvimos nos primeros díes del viaxe.
Entradas
