Les Últimes Hores

Yera algo temprano pa cenar, asina qu'entamamos a caleyar cai abaxo cola sensación na tiesta de que'l viaxe ya finaba y había que aprovechar les últimes hores. Dímonos cuenta que entá teníamos delles llires turques en bolsu y sabíamos que si intentábamos cambiales nel aeropuertu díbamos a salir perdiendo. Esti ye un tema complicáu, por que enantes de colar pa la Capadocia, tuvimos que cambiar euros a llires, a sabiendes que nel restu del viaxe nun díbamos a atopar cases de cambiu (Döviz) con tanta facilidá, pero nun podíamos cambiar muncho pa que nun nos sobrara al final y perder perres nel cambiu a euros, otra vegada. Como había que cambiar eses perres, aprovechamos pa mercar caxigalines de turista, regalinos pa la familia y una caxa d'aquellos pastelinos que había den delles confiteríes y que ya nos habíen llamao l'atención cada vegada que pasábamos pol escaparate. Repartímolos salomónicamente y duraron dos minutinos, aunque la sensación de fartura que nos dexó, duró daqué más.

Tiramos en dirección a Santa Sofía, por que como yera Ramadán, aquel parte que taba ente Santa Sofía y La Mezquita Azul, yera una fiesta, con puestos de comida, tiendes y xente asgaya, como si tuviéramos en San Pedru de La Felguera. Teniendo en cuenta que, la nuesa motilidá gastrointestinal nun había camudao del estáu sólidu en tol viaxe, quisimos tentar a la suerte comiendo un quebab turcu nun chigre de dudosa llimpieza. Habíamos lleío na rede que'l quebab turcu yera mui estremáu al que se podía xintar por España, por que tenía un sabor a montunu pergrande y había xente que-y resultaba desagradable. Fuimos a comprobalo a un bar y mandáronnos xubir a la parte d'arriba. Llera un sitiu afayaizu, por que tábamos nun comedor, casi solos, viendo tol parque y la xente que diba d'un lláu a otru. Xintamos el quebab y la verdá ye que nun nos paeció pa tanto. Si tas avezáu a xintar corderu a l'astaca de Peña Mea, de xuru que tienes otru conceptu de lo que ye sabor a montunu. Terminamos de cenar y baxamos de nuéu al megoyu dando l'ultimu paséu ente la xente que aprovechaba les hores nocturnes pa xintar, beber y facer tolo que'l Ramadán prohibe pol día. Ya yera algo tarde y pensando nel viaxe de vuelta y que en poques hores, el bus diba a dir a buscanos al hotel, decidimos dir tornando pa la habitación, a ver si polo menos nos daba tiempu a dormir un par d'hores y poder duchanos. El viaxe finaba nel mesmu sitiu qu'había entamao, na tremenda ciudá d'Istanbul.